AZƏRBAYCAN İQTİDARI KONSTRUKTİV SİYASİ TƏSİSATLARLA DİALOQUN DAVAM ETDİRİLMƏSİ TƏRƏFDARIDIR

Azərbaycan demokratik dəyər və təsisatların təşəkkül tapdığı müasir hüquqi dövlətdir. Ölkəmizdə daxili siyasət kursunun mühüm istiqamətlərindən birini demokratik təsisatların təkmilləşdirilməsi, ictimai-siyasi institutların fəaliyyətinə müsbət töhfə verən institusional islahatların həyata keçirilməsi təşkil edir. Söz, fikir və özünüifadə, eləcə də internet azadlığının təmin olunması, medianın və vətəndaş cəmiyyətinin müstəqil inkişafına xüsusi diqqət yetirilməsi, o cümlədən ictimai-siyasi institutların legitim fəaliyyətinə əlverişli şəraitin yaradılması Azərbaycanın intensiv inkişafının, əsaslı ictimai-siyasi sabitliyin və siyasi sistemin dinamikliliyinin davamlı olacağına əminlik yaradır.

Eyni zamanda, Azərbaycan siyasi, hüquqi islahatları davam etdirmək əzmindədir və bu kontekstdə həyata keçirilən bütün tədbirlər siyasi sistemin təkmilləşməsinə xidmət edir.

Bütün bunların fonunda Azərbaycan iqtidarı konstruktiv siyasi fəaliyyətə malik olan institutlarla dialoq təşkil etməklə də siyasi sistemin inkişafına xüsusi diqqət yetirir. Çünki siyasi dialoq, bir tərəfdən, partiyalar və digər təsisatlar arasındakı münasibətlərin əməkdaşlıq, sağlam rəqabət müstəvisində cərəyan etməsini şərtləndirir, digər tərəfdən isə, siyasi sistemin struktur elementlərinin təkmilləşməsinə müəyyən töhfələr verir. Ümumiyyətlə, siyasi dialoq fəaliyyətdə olan aktorların müəyyən dəyərlər və maraqlar əsasında digər subyektlərlə yaratdığı siyasi ünsiyyət formasıdır. Başqa sözlə, siyasi dialoq özündə müəyyən dəyərlər, maraqlar, məsələlər və tərəfləri ehtiva edən əlaqələr sistemidir. Müxtəlif cəmiyyətlərdə siyasi sistemin xarakteristikasından asılı olmayaraq birbaşa və ya dolayı şəkildə baş tutan dialoq tərəflər üçün xüsusi əhəmiyyət kəsb edən məsələlər ətrafında həyata keçirilir və bir çox hallarda dialoqun nəticəsi kimi qəbul edilmiş qərarlar cəmiyyət daxilində bu və ya digər ictimai-siyasi proseslərə əhəmiyyətli dərəcədə təsir göstərir. Bu baxımdan, ölkəmizdə də konstruktiv siyasi subyektlərlə Azərbaycan iqtidarının dialoq mexanizminin formalaşdırılması sadalananlar baxımından müstəsna önəm kəsb edir.

Bu kontekstdə xüsusi əhəmiyyət kəsb edən nüans budur ki, siyasi islahatları mütəmadi şəkildə davam etdirən Azərbaycan iqtidarı hər zaman siyasi təsisatlarla dialoqun davam etdirilməsi tərəfdarı kimi çıxış edib. Vaxtaşırı müxalifət partiyaları ilə görüşün keçirilməsi bunu göstərən növbəti faktdır. Fevralın 12-də Azərbaycan Respublikası Prezidenti Administrasiyasının İctimai-siyasi məsələlər şöbəsinin müdiri Əli Həsənovun ölkədə fəaliyyət göstərən siyasi partiyaların rəhbərləri ilə növbəti görüşündə bu məsələlər diqqət mərkəzində olub. Əli Həsənov görüşdə bu məqamı xüsusilə diqqətə çatdırıb ki, Azərbaycanda siyasi partiyalarla hakimiyyət arasında istənilən məsələ müzakirə oluna bilər: “Çünki bu iki institut Azərbaycan cəmiyyətinin faktiki olaraq bugünkü və gələcək idarəçiliyinin, daxili və xarici siyasətinin taleyini müəyyən edir. Hazırda hakimiyyətdə olan siyasi qüvvə ilə ona müxalif olan qüvvələr arasında ölkənin, cəmiyyətin bu günü və gələcəyi ilə bağlı istənilən məsələ müzakirə mövzusu ola bilər. Əminəm ki, bu görüşdə də siyasi partiya rəhbərləri tərəfindən yaxşı ideyalar, mövzular təklif olunacaq və biz gələcəkdə müzakirələr aparıb müəyyən fikrə gələcəyik”.

Siyasi dialoq siyasi sistemlə yanaşı, siyasi mədəniyyətin də təkmilləşməsinənə mühüm töhfələr verir. Ümumiyyətlə,  müxtəlif ölkələrin inkişaf səviyyəsini qiymətləndirərkən əsas götürülən fundamental meyarlardan biri kimi siyasi mədəniyyət amili ön plana çəkilir. Son zamanlar müxtəlif strateji araşdırma mərkəzləri milli dövlətlərin daxili potensialı və gücünü, perspektiv inkişaf istiqamətlərini dəyərləndirmək üçün siyasi sistemin mühüm struktur elementlərindən olan siyasi mədəniyyəti xüsusi tədqiqat obyekti kimi nəzərdən keçirirlər. Yuxarıda bəhs edilən görüş siyasi mədəniyyətlə yanaşı, vətəndaş cəmiyyətinin inkişafı nöqteyi-nəzərindən də əhəmiyyətlidir. Təbii ki, burada Azərbaycan iqtidarının ali siyasi iradəsi müstəsna önəm daşıyır. Azərbaycan Prezidenti Administrasiyasının İctimai-siyasi məsələlər şöbəsinin müdiri Əli Həsənovun qeyd etdiyi kimi: “Azərbaycan hakimiyyətinin, Prezident İlham Əliyevin mövqeyi ondan ibarətdir ki, Azərbaycanda bütün institutlar, siyasi partiyalar, qeyri-hökumət təşkilatları, mətbuat orqanları dövlət siyasətinin formalaşmasında və həyata keçirilməsində iştirak etsinlər, Azərbaycan şəffaf cəmiyyətə malik olsun, siyasi islahatlar davam etdirilsin. Hazırda siyasətin formalaşdırılmasında, dövlətin idarə edilməsində ictimai şuraların yaradılmasına böyük əhəmiyyət verilir. Bütün nazirliklərdə, komitələrdə bu şuralar yaradılır. Hesab edirik ki, dövlət siyasətinin formalaşmasında da elə ictimai şura rolunu bu görüşlər oynayacaq”.