Mədəniyyətlər və Dinlər arası əlaqələrin simvolu - “BİRİNCİ XANIM” kitabının Novosibirskidə təqdimat mərasimi

Avqustun 19 da Bakı-Novosibirski təyyarə reysi ilə uçuşa hazırlaşanda uzaq Sibir şəhərində belə isti qarşılanaçağımızı heç düşünməmişdik. Sibir sözünün özü belə soyuq təsir bağışladığı halda günəşli Azərbaycan nümayəndə heyəti özü ilə isti havanı da aparmağı unutmamışdı. Hava məlumatı xəbər verirdi - “ Novosibirski son 100 ilin ən isti , hərarətli gününü yaşayır! “

Bizi Tolmaçova Hava Limanında əllərində gül-çiçək Novosibirskidə yaşayan soydaşlarımız qarşıladı. Səmimi, gülərüz, əsl azərbaycanlı kimi qonaq qarşılayan soydaşlarımızın gözləri gülürdü. Elə ilk dəqiqədən bu mehriban insanlarla dostlaşdıq və mən hiss etdim ki, səfər belə xoş notlarla başladısa deməli ardı ürəkaçan olacaq...

1893-cü ildə təməli qoyulan, uçsuz-bucaqsız Rus çöllərinin  ikinci böyük çayı – Ob çayının hər iki sahilini bəzəyən, ölkənin ucqar vilayətlərinədək qatar yolu keçən, keçmiş  Novonikolayevski şəhəri bizi günəşli bir gündə beləcə salamladı...

Avqustun 20 - 21 tarixlərində Rusiyada fəaliyyət göstərən Türkdilli xalqlarla Slavyan xalqları arasında əməkdaşlıq fondu “Həmrəylik” adlı möhtəşəm bir təbdir keçirdi. Rusiyada yaşayan azərbaycanlılar və Azərbaycandan tədbirə qatılan nümayəndə heyəti Novosibirskidə bir araya toplandı.

Heydər Əliyev adına fondun 10 illik yubileyi, YUNESKONUN və İSESKONUN sülhməramlı səfiri, millət vəkili , Heydər Əliyev fondunun prezidenti Mehriban xanım Əliyevanın ictimai-siyasi fəaliyyətinə həsr olunmuş “DOSTLUQ KÖRPÜSÜ” Azərbaycan – Rusiya adlı dövlətlərarası elmi-nəzəri konfrans və musiqili ədəbi-bədii gecədə həm Azərbaycan , həm də Rusiya vətəndaşları çıxışlar etdi.

 Azərbaycan Mətbuat Şurasını təmsil edən Rəhim Hüseynzadə, Azərbaycan Respublikası Diasporla İş Üzrə Dövlət Komitəsini təmsil  edən Elçin Soltanov, həmçinin Azərbaycan Yazıçılar Birliyi adından Rauf Aslanov, şair-publisist Mirkazım Seyidov və  Novasibirskidə yaşayan ictimai-siyasi xadimlər, ziyalılar dünyanın diqqətində olan məsələlərə nəzər yetirdilər.

Tədbirin davamında  şair-publisist Mirkazım Seyidovun azərbaycan, rus və ingilis dillərində çapdan çıxmış “BİRİNCİ XANIM” kitabının təqdimat mərasimi keçirildi. Poemanı  Lider TV-nin “Səhər Çağı” proqramının aparıcısı Nuranə Axundova və jurnalist Teyyuba Məmmədova səsləndirdi. Onu da qeyd edək ki, aparıcıların  geyimi də Novosibirski tamaşaçılarının diqqətini cəlb etdi. Tanınmış modelyer Gülnarə Xəlilovanın milli ornamentlərlə bəzənmiş geyimləri səhnədə çox füsünkar görünürdü.

Daha bir rəsmi görüş Novosibirski Şəhər Merinin müavini Gennadi Zaxarovla oldu. Azərbaycan nümayəndə heyətini çox səmimi qarşılayan mer oğlunun hal-hazırda Bakıda, azərbaycanlı bir dostunun qonağı olduğunu bildirdi. Dedi, ”mən azərbaycanlılarla həmişə dost olmuşam və onların xarakterini çox bəyənirəm” Merin görüşünə həmyerlimiz Rasim Babayevlə getmişdik. O, Novosibirski Qubernatorluğunda məsul vəzifədə çalışır və şəhərin mühüm işlərində onunla məsləhətləşirlər.

Rusiyalı rejissor Vladimir Krlovun hazırladığı yubiley konsertində xalq artistləri Bilal Əliyev, Simarə İmanova, müğənni Sədaqət Ulduz və musiqiçilər-tarda Ramin Rzayev, kamançada Anar Yusub iştirak edirdi. Konsertdə Novosibirski “Qlobus” Dram Teatrının aktyoru Niyaz Ospanbayevin ifasında Rusiyanın və Azərbaycanın fəxri olan  böyük sənərkar Müslüm Maqomayevin repertuarı da səsləndi.

 Novosibirskidə keçirilən Türkdilli xalqlarla Slavyan xalqları arasında həmrəylik və dostluq əlaqələrinin daha da genişlənməsinə xidmət edən bu tədbir gələcək uğurlu işlərin başlanğıcı oldu. Tədbirin təşkilatçısı şair-publisist Mirkazım Seyidov –“ hələ möhtəşəm tədbirlərimiz irəlidədir” deyib, bizi yenə gül-çiçəklə Tolmaçova Hava Limanından Bakıya yola saldı.

p.s nədənsə mən özümü Novosibirskidə heç də Rusiyada olduğu kimi hiss etmədim. Azərbaycanlılar bu şəhəri “özəlləşdiriblər”-yaxşı mənada az qala ruslar belə Azərbaycanca danışır. Hətta restoranlarda belə Azərbaycanca dediyin sözü aydın şəkildə başa düşürlər və bizi də çox sevirlər. Hər halda mənə belə gəldi və buna da çox sevindim.