Nazirlik İŞİD-ə qoşulan güləşçidən yaxasını kənara çəkdi: “Əlaqəni kəsmişik...”

Hazırda dünyanı dəhşətə salan  “İraq və Şamın İslam Dövləti” (İŞİD, yaxud “İslam Dövləti”) qruplaşmasının tərkibində döyüşmək üçün azyaşlı uşağı və həyat yoldaşı ilə birlikdə Suriyaya gedən İsmayıllı sakinlərindən birinin tanınmış güləşçi olduğu xəbər verilmişdi.

Rəşad Baxşəliyev adlı həmin güləşçi İsmayıllı Olimpiya İdman Kompleksində güləş üzrə məşqçi işləyirmiş və respublika üzrə yarışlarda dəfələrlə yüksək nəticələr göstəribmi. R.Baxşəliyev Suriyaya döyüşməyə gedən və radikal cihadçl qruplaşmalara qoşulan yeganə idmançı deyil. Bundan əvvəl də Azərbaycandan bir neçə tanınmış idmançıların Suriyaya getdiyi və orada gedən döyüşlərdə öldürüldüyü məlumdur.

Bəs İsmayıllının idman sahəsinə cavabdeh məmurları, İdman və Gənclər Nazirliyi R.Baxşəliyevin İŞİD-ə qoşulmaq üçün Suriyaya getməsini necə dəyərləndirir? Virtualaz.org dəqiqləşdirib ki, Rəşad Baxşəliyev İsmayıllı Olimpiya İdman Kompleksində yunan-roma və sərbəst güləş üzrə məşqçi işləyirmiş. Onun məşqçi olaraq fəaliyyət göstərməsi haqda Azərbaycan Güləş Federasiyasını saytında da məlumatlar yer alır.

R.Baxşəliyevlə birlikdə İsmayıllı Olimpiya İdman Kompleksində çalışan cüdo üzrə baş məşqçis Əkbər Şəfaqətovla əlaqə saxlayaraq onun barəsində əlavə məlumatlar öyrənməyə cəhd etdik.  Ə.Şəfaqətov onu şəxsən tanımadığını lakin Suriyaya getməsindən xəbərinin olduğunu söylədi.  “Biz ayrı-ayrı bölmələrdə işləyirdik. Mənim onunla heç bir şəxsi münasibətim olmayıb. Mən də eşitmişəm gedib Suriyaya. Bildiyimə görə ailəsi Kəlbəcərdən gəlib İsmayıllıda məskunlaşıb. Başqa heç nə bilmirəm. Mən yetirmələrimi dövlətə, vətənə sədaqət ruhunda yetişdirirəm, kimsə hansısa təsir altına düşübsə nə deyə bilərəm. Bir daha deyirəm ki, mənim o adamla şəxsi münasibətim olmadığından barəsində əlavə heç nə bilmirəm”- deyə Şəfaqətov bildirdi.

İsmayıllı rayon Gənclər və İdman idarəsinin rəisi Taleh Salehov da Rəşad Baxşəliyev haqda yayılan məlumatlardan xəbərdar olduğunu söylədi. Lakin bu haqda heç nə deyə bilməyəcəyini bildirdi. T.Salehov virtualaz.org saytına açıqlamasında dedi ki, bu barədə məlumatı yalnız rayon icra hakimiyyətinin mətbuat xidmətinin rəhbəri Valeh Salehov verə bilər.  İcra hakimiyyəti ilə əlaqə saxlasaq da Valeh Salehovla danışa bilmədik. O, iş yerində deyildi.

Məsələ ilə bağlı Gənclər və İdman Nazirliyi publika.az saytına açıqlama verib. Nazirliyin mətbuat xidmətinin rəhbəri Səmayə Məmmədova Rəşad Baxşəliyevin komplekslə 2013-cü ildən əlaqəsinin olmadığını deyib:“Rəşad Baxşəliyev əslən Kəlbəcər rayonundandır. Sonradan onlar İsmayıllının Xankəndi kəndinə köçüblər. Xankəndidə məktəbdə idman müəllimi kimi fəaliyyət göstərib. 2013-cü ildən isə bizə müraciət edib, bildirib ki İsmayıllıdakı İdman Olimpiya Kompleksində məşqçi kimi fəaliyyət göstərmək istəyir.O, kompleksdə müqavilə əsasında işləyib. Yəni ştata götürülməyib. 2013-cü ilin aprel-may aylarında o adam bizimlə müqavilə imzalayıb. Müqavilə imzaladıqdan sonra vaxtında kompleksə gəlib-getmirdi.2013-cü ilin noyabrında kompleksdəki dərslərini vaxtında apara bilmədiyinə  görə onunla bağlanan müqavilə dayandırıldı. Bundan sonra onun bizim komplekslə heç bir əlaqəsi olmayıb”.

Qeyd edək ki, Azərbaycanda idmançılar arasında radikal dini cərəyanlara meylin artması ciddi narahatlıq doğurur. Bir çox hallarda idmanda yüksək nəticələr göstərmiş idmançılar radikal dini cərəyanların təsiri altına düşərək cihadçılara qoşulmaq üçün Suriyaya, İraqa gedirlər. İndiki halda nazirlik R.Baxşəliyevlə bağlı məsələdən yaxasını kənara çəksə də belə görünür ki, idman sahəsinə cavabdeh olan məmurlar bu ciddi problemlə bağlı daha dərindən məşğul olmalıdır.Virtualaz.org