İstanbul, Ankara, İzmir və Kayseridə Qarabağ həqiqətləri təbliğ olundu

Strategiya.az-a verilən məlumata görə, Türkiyə şəhərlərində Qarabağ həqiqətlərini əks etdirən konfrans və sərgilər keçirildi.

      Azərbaycan Respublikası Prezidenti yanında QHT- lərə Dövlət Dəstəyi Şurasının dəstəyi ilə "Müharibə Veteranı Qadınlarına Sosial Yardım" İctimai Birliyinin "İsveçin Stokholm və TürkiyəninAnkara, şəhərlərindəki universitetlərdə Qarabağ informasiya guşəsinin yaradılması"adlı layihə uğurla başa çatıb. Bu barədə Birliyin sədri Radə Abbasın verdiyi məlumata görə, layihənin əsas məqsədi  xarici ölkələrin gəncləri ilə canlı təmas quraraq Azərbaycan və Türk dünyasının uzun illərdir başına gətirilən müsibətlərin onlara çatdırılması və hər bir ölkədə Qarabağın azadlığı üçün sadə vətəndaşlardan ibarət dayaq nöqtəsi yaratmaq olub:

 "Nəzərdə tutduğumuz şəhərlərdən başqa Türkiyənin bir neçə şəhərinə toplantılar üçün dəvətimiz olsada Kayseri şəhərini seçdik. Azərbaycan həqiqətləri və Qarabağın tarixi ilə əlaqəli konfrans və sərgi keçirildi. Kayseri şəhərinə aparılmış təbliğat materialları Erciyes unversitetinə hədiyyə olundu. Uşaq bayramında iştirak edərək Azərbaycandakı qaçqın və məcburi köçkün uşaqlarının  öz doğma evlərində bayram keçirmək haqqını erməni və rus birləşmələri əllərindən aldıqlarını diqqətə çatdırdıq. Açıq havada keçirilən bu toplantı çox möhtəşəm idi. Kayseri şəhər "KAY TV" və "Kampus" televiziyalarında canlı yayımda verlişlərin birinin qonağı olduq. Həmin gün jurnalist gənclərin bir qrupu ilə görüşdük və Türk dünyasının yaxınlaşması, bir-birimizi tanımaq üçün gələcəkdə görüləcək işlər müzakirə edildi. Jurnalist gənclər Xocalıda qətlə yetirilmiş uşaqlar haqqında bir kitab hazırlanmasını təklif etdilər və həmin kitabın ingilis dilinə və Anadolu türkcəsinə tərcümə edib, yaymaq istədiklərini bildirdilər. Məndə belə bir kitabın artıq çoxdan yazıldığını bildirdim və Səriyyə Cəfərovanın “Onlar heç vaxt böyüməyəcəklər” kitabının tərcümə edilərək yayılmasını xahiş etdim. "Türk Dünyası Qadınlarının Dostluq və Dayanışma Dərnəyi"ndəki görüşdə başqan Aysel Özkan Azərbaycanı çox sevindiyini, gələcəkdə Azərbaycan həqiqətlərinin dünyaya yayılmasına dəstək verəcəyini bildirdi.

 Həmçinin İstanbuldakı Azərbaycan Mədəniyyət Evində dərnək rəhbəri Hikmər Elpinin rəhbərliyi və təşkilatçılığı ilə layihəmizin daha bir toplantısı keçirildi. Həmin gün İstanbulda "CEM TV"- də canlı yayımda “Savaş və qadın” adlı proqramda iştirak edərək yenədə Azərbaycan- Qarabağ mövzusunda danışdıq.

 Daha sonra 5 orta məktəbin şagirdləri arasında “Mən Azərbaycanı tanıyıram” adlı yazı müsabiqəsi keçildi. Layihə çərçivəsində çap edilmiş kitablar,  müxtəlif təbliğat materialları və dövlət bayrağımız ilə birgə tədbirə layihəmiz adından onlara hədiyyə olundu.

 Millət vəkilləri Koray Aydın, Sinan Oğan, Ruhsar Dəmirəl və Yusuf Halacoğlu ilə görüşümüz oldu. Onlarla Azərbaycan və Qarabağ həqiqətləri ilə bağlı beynəlxalq konfrasın, tarixi sərgilərin Avropa şəhərlərində keçirilməsi və digər layihələrin həyata keçirilməsi haqda danışdıq.

 Ankarada  Türkiyə Orta Şərq İdarəçilik İnstitutunda “Azərbaycanın işğal altında saxlanılan torpaqları” adlı elmi konfrans və tarixi materiallardan ibarət sərgi təşkil edildi. İzmirdə isə Qazəmir bələdiyyə başqanı Halil İbrahim Şenolla görüşərək dekabrda qaçqın və köçkünlər günü münasibəti ilə "Qarabağ və soyqırım həqiqətləri" adlı beynəlxalq konfransın keçirilməsi üçün razılaşma əldə etdik".  

 Xatırladaq ki, layihənin mahiyyətinin ictimayiyyətə çatdırılması məqsədi ilə sonuncu toplantı Bakı şəhərində BMM- də keçirilib.